O pasado domingo día 23 de novembro do 2008 celebrouse nas pistas do Colexio Seis do Nadal a Presentación Oficial do Club Baloncesto Seis do Nadal - Coia nesta tempada 2008-2009.
Máis de 400 deportistas déronse cita nesta Presentación Oficial nas instalacións do Colexio Seis do Nadal; máis de 250 xogadores e xogadoras de equipos federados e aproximadamente 200 rapaces e rapazas das Escolas Deportivas. Estas cifras fan que cada ano o Club Baloncesto Seis do Nadal - Coia sexa o club coa maior canteira da cidade de Vigo e cunha das mellores canteiras da comunidade.
Cada equipo federado, cada escola deportiva, o equipo de adultos e o corpo técnico foi presentado á gran cantidade de persoas asistentes ao acto e aos medios de comunicación a través dun desfile dos integrantes de cada equipo e dunha foto de equipo oficial da tempada 2008/09.
Unha vez presentados cada un dos equipos tiveron lugar as intervencións dos dirixentes da entidade e das autoridades que acompañaron ao noso club na Presentación Oficial.
Abriu o acto D. José Jesús Outeiral Míguez, Presidente do Club Baloncesto Seis do Nadal - Coia; e seguiron no turno de palabra D. Francisco Xavier Alonso Pérez; Concelleiro de Deportes do Concello de Vigo; Dna. María Xesús López Escudeiro; Delegada Provincial de Cultura e Deporte; D. Jose Luis Pérez Pérez, representante da Federación Galega de Baloncesto e da Delegación Viguesa de Baloncesto; D. Sergio González Larrañaga, Director Deportivo do Club Baloncesto Seis do Nadal - Coia; pechando as intervencións D. Aalí Salem Mohamed Aalí Mulud; Presidente Honorífico do Club Baloncesto Seis do Nadal - Coia.
Cunha grada repleta de familiares, amigos, patrocinadores e colaboradores, o Club Baloncesto Seis do Nadal - Coia pechaba o acto de Presentación Oficial da tempada 2008-09 cunha gran foto de grupo con tódolos deportistas, monitores e adestradores que conforman esta gran familia que é o Seis do Nadal, que ano tras ano segue medrando e conseguindo cifras históricas a nivel deportivo.
Xa está dispoñible no Álbum de Fotos da páxina web do Club Baloncesto Seis do Nadal - Coia unha ampla reportaxe de fotografías da Presentación Oficial da tempada 2008/09: fotos de equipo, fotos do desfile, fotos de grupo, fotos das intervencións e moitas outras.