O Club Baloncesto Seis do Nadal - Coia proclamouse, o pasado domingo 1 de xuño do 2008, Campión Galego Alevín Feminino nesta tempada 2007/08
O equipo Alevín Feminino "A" do Club Baloncesto Seis do Nadal - Coia, dirixido por Marcos López, triunfou no Campionato de Minibásquet McDonald´s que se celebrou o pasado domingo 1 de xuño en Santiago. Este torneo reuniu aos oito mellores equipos galegos alevíns femininos de Minibásquet.
As nosas rapazas comezaron a xornada xogando contra o Salesianos de Ourense, partido que gañaron cun marcador a favor de 51 a 66. Xa pola tarde, o Club Baloncesto Seis do Nadal - Coia xogábase o pase á final do torneo fronte o Mercedarias de Ferrol. Nun partido onde as nosas rapazas lograron despregar un gran xogo de equipo cunha gran intensidade, o Seis do Nadal conseguía vencer o encontro por 53-78.
A final do Campionato Galego de Minibásquet McDonald´s volvía a xuntar ao Seis do Nadal e ao Maristas Celta. Ambos equipos conseguiron vencer nos dous partidos previos e lanzábanse á final directamente. Esta final destacou pola súa igualdade ao longo de todo o partido, pola súa intensidade e polo gran xogo que demostraron ambos conxuntos. As nosas xogadoras remataron a primeira parte cunha desvantaxe de máis de 10 puntos que alonxaba por momentos o campionato. Pero na segunda parte o Seis do Nadal mostrou a súa mellor cara e conseguiron igualar o partido para facerse co triunfo no último tramo do mesmo cun resultado a favor de 65 a 78.
Desde o Club Baloncesto Seis do Nadal - Coia queremos felicitar e darlle a noraboa ao equipo Alevín Feminino "A" polo título galego conseguido en Santiago e polo excelente traballo que realizaron durante todo o campionato e durante toda a xa rematada tempada 2007/08. Felicidades para todo o grupo, xogadoras e adestrador!