DATA LÍMITE DE INSCRICIÓN DA SEGUNDA SEMANA:
VENRES 31 DE AGOSTO DO 2012
.
O Club Baloncesto Seis do Nadal - Coia organizará nestas vacacións de verán e coincidindo coas primeiras semanas do inicio da pretempada 2012/2013 a 8ª Edición do Campus de Tecnificación: "Xornadas de Pretempada" - Verán 2012. Despois dos éxitos das sete pasadas edicións do campus de tecnificación a entidade olívica volverá a celebrar as xornadas de perfeccionamento técnico con dúas semanas diferenciadas por contido de traballo.
.
O obxectivo destas xornadas é reforzar o traballo de técnica individual dos deportistas do Club Baloncesto Seis do Nadal e do baloncesto vigués e galego, fundamentalmente nas idades óptimas para a formación.
.
A Oitava Edición do Campus de Tecnificación se celebrará en dúas semanas distintas no Colexio Seis do Nadal (Coia). Se está a celebrar a primeira das semanas nos días 27, 28, 29 e 30 de agosto do 2012 entre as 10:30 e as 13:30 horas, e está centrada no traballo de perfeccionamento do tiro. A segunda semana terá lugar os próximos días 3, 4, 5 e 6 de setembro do 2012 entre as 10:30 horas e as 13:30 horas, e se traballarán diversos fundamentos técnicos individuais.
.
O prazo de inscrición aínda segue aberto para a segunda das semanas do 8º Campus de Tecnificación de Pretempada 2012. Poden inscribirse os deportistas dos equipos federados e das escolas deportivas do Club Baloncesto Seis do Nadal Coia e tamén se poderán anotar os deportistas do baloncesto vigués e galego que o desexen, desde categoría benxamín (nados no ano 2005) ata categoría júnior (nados no 1995).
.
O prezo para a segunda semana do campus é de 30 euros para os deportistas do Club Baloncesto Seis do Nadal - Coia, dos equipos federados e das escolas deportivas, e os seus irmáns ou irmás, e de 40 euros para deportistas doutros clubs ou entidades.
.
As prazas dispoñibles para a segunda semana das Xornadas de Pretempada 2012/13 son limitadas e se farán efectivas por rigorosa orde de inscrición (sendo válida a data que figure no ingreso). Para formalizar a inscrición é preciso enviar o comprobante de pago (co nome completo do deportista e o club ao que pertence) e a folla de inscrición, antes do 31 de agosto do 2012, a baloncestoseisdonadalcoia@gmail.com ou ao fax 986227275.
.
Pódese descargar a folla de inscrición do 8ª Campus de Tecnificación: Xornadas de Pretempada 12/13 pulsando na seguinte imaxe.
.
