.
O equipo Infantil Masculino "A", Mondariz Seis do Nadal, do Club Baloncesto Seis do Nadal - Coia, adestrado e dirixido esta tempada por Sergio González, Diego Montenegro e Alicia Álvarez, conseguiu unha praza para xogar a Fase Final do Campionato de España Infantil Masculino que terá lugar en Vegadeo (Asturias) do 15 ao 20 de xuño do 2010.
.
O último encontro disputado polo Mondariz Seis do Nadal na Fase Interautonómica Infantil Masculina Grupo Norte que se disputou en Valladolid do 3 ao 6 de xuño foi ante o Serna Solar Palencia, terceiro clasificado da liga de Castela León.
.
Na primeira parte do encontro os equipos amosaron unha gran intensidade e igualdade que foi ben reflexaba no marcador, chegando ao descanso cunha vantaxe de dous puntos a favor do Seis do Nadal. No terceiro período continuou a igualdade entre ambos quintetos, comezando o último cuarto do partido cun empate no electrónico (48-48). Foi no último cuarto onde o equipo vigués conseguiu un gran parcial (20-5), debido a un crecente ritmo e intensidade e a un gran traballo de equipo tanto ofensivo coma defensivo, que deixaba o resultado final a favor do Seis do Nadal cun 68-53.
.
Este resultado clasifica ao Infantil Masculino "A", Mondariz Seis do Nadal para a Fase Final do Campionato de España Infantil Masculino, feito histórico no Club Baloncesto Seis do Nadal - Coia xa que será a primeira vez que un equipo da entidade participa nun Campionato de España de clubs.
.
O outro equipo galego, Cidade de Lugo 96, tamén venceu na outra final da Fase Interautonómica Infantil Masculina do Grupo Norte. Vigueses e lucenses, venceron pois os seus encontros finais, rubricando así a súa participación na Fase Final do Campionato de España.
.
Os resultados destes partidos, así como os seus rivais nos mesmos, foron os seguintes:
.
FINAIS
DOMINGO 6 DE XUÑO DO 2010
10:15 H. CIDADE LUGO 96 87 - PONCE JULIÁN MARÍAS 54
12:30 H. MONDARIZ SEIS NADAL 68 - SERNA SOLAR 53