.
A Federación Galega de Baloncesto celebrará esta fin de semana a terceira e derradeira concentración do Campionato Galego de Seleccións Zonais en categoría Minibásquet.
.
Esta última cita da competición, a terceira en total, repartirá os seus encontros entre as vilas de Allariz e de Santiago de Compostela e permitirá dilucidar os vencedores absolutos do título tanto en categoría feminina como en masculina.
.
Así, no Pavillón Municipal de Allariz, o sábado 13 de xaneiro, e no Pavillón compostelán de Vite, o domingo 14 de xaneiro, celebraranse os encontros que completarán a liga a unha volta, todos contra todos, na que se basea o Campionato.
.
Na vila ourensá competirán as seleccións das delegacións de Ourense, Arousa e Lugo. Pola súa banda, o domingo día 14 en Santiago enfrontaranse os combinados composteláns xunto coas seleccións de A Coruña, Ferrol e Vigo. Todos eles loitarán por facerse cun campionato que lideran Vigo en categoría feminina e Ferrol na masculina.
.
O Club Baloncesto Seis do Nadal - Coia estará presente unha vez máis nesta derradeira xornada do Campionato Galego de Seleccións Zonais.
.
Na Selección Viguesa Alevín Masculina representará ao noso club Borja Astray, xogador do Alevín Masculino "A", Caixanova Seis do Nadal, adestrado e dirixido por Carlos Rodríguez e Silvia Caíño. No combinado vigués feminino son Alicia Muñoz e Ángela Rodríguez, xogadoras do Alevín Feminino "A", Caixanova Seis do Nadal, equipo adestrado por Beatriz Vaquero, as xogadoras do noso club que xoguen o Campionato Galego de Seleccións Zonais.