Aalí Mohamed e Sandra Solano dirixirán ao grupo Alevín Feminino "B" do Club Baloncesto Seis do Nadal - Coia na próxima tempada 2009/2010. Este conxunto estará formado integramente por xogadoras nadas no ano 1999 e que xogarán o seu primeiro ano en categoría alevín.
Aalí Mohamed, adestrador principal deste equipo, é un dos adestradores con máis historia do noso club, xa na tempada 1983/1984 estaba dando as súas primeiras indicacións nos nosos colexios xunto a un grupo de colaboradores que lle axudaron a arrancar nos momentos iniciais do que hoxe é a nosa entidade. Na primeira tempada Aalí Mohamed contribuiu a prantar o xerme inicial do Club Baloncesto Seis do Nadal.
Sandra Solano, no que será a súa terceira campaña como técnica do noso club, desenvolverá funcións de adestradora axudante neste equipo xunto a Aalí Mohamed. Na tempada pasada 2008/2009 adestrou ao conxunto Benxamín Feminino composto por xogadoras que este ano militarán no conxunto Alevín Feminino "B" coas que Sandra Solano xa traballou a pasada campaña.
Esta parella de adestradores que aúna experiencia e ilusión serán os encargados de dirixir ao Alevín Feminino "B", equipo no cal o obxectivo principal será que as xogadoras progresen no que vai ser a súa primeira experiencia en categoría alevín, coñecendo e adquirindo novos conceptos e fundamentos do deporte da canastra.