.
O Gestibérica Vigo visitou o pasado mércores 19 de setembro o Colexio Seis do Nadal. O pívot checo Daniel Dousa, o alero americano Shawn Jackson, o base porriñés Nando Pérez e o vigués Fernando Vidal, acompañados polo director deportivo do Gestibérica, Miguel Ángel Ortega, e o delegado Jacobo Martínez, compartiron a mañá cos alumnos con necesidades educativas especiais e discapacidades motoras do centro educativo no que o propio Fernando Vidal cursou os seus estudos na nosa cidade.
.
Os pequenos estudantes mostráronse encantados e fascinados pola visita, impresionados todos por igual pola altura dos xogadores. Ademais, tódolos rapaces e rapazas recibiron carteis firmados polos xogadores e invitacións para presenciar o seu próximo partido no pavillon de As Travesas.
.
A boa acollida recibida pola delegación do Gestibérica e as solicitudes por parte do profesorado do colexio propiciarán que en próximas datas os representantes do Gestibérica repitan de novo visita ao Colexio Seis do Nadal, esta vez para manter un encontro coa totalidade de estudantes do centro.