(Membros do Club Baloncesto Seis do Nadal - Coia xunto a Manel Fernández, Concelleiro de Deportes do Concello de Vigo, durante a presentación das novas edicións das Ligas LINCO)
.
O xa pasado xoves día 26 de xaneiro do 2017 tivo lugar no Concello de Vigo a presentación aos medios das dúas novas edicións das Ligas Internas de Colexios, Ligas LINCO, que organizará o Club Baloncesto Seis do Nadal - Coia co apoio do Concello de Vigo na presente tempada 2016/2017.
.
Durante a presentación das novas Ligas LINCO 2017, Manel Fernández, Concelleiro de Deportes do Concello de Vigo, estivo acompañado pola Presidenta do Club Baloncesto Seis do Nadal - Coia, Concepción Martins; os membros da Xunta Directiva Ramón Román, Francisca García e Miguel Ángel Pena; o Director Deportivo do club, Sergio González; dous adestradores de base, Sabela Solla e Diego Montenegro; e dous xogadores do equipo de Liga EBA, Pablo González e Óscar García, este último formado nas Escolas Deportivas da entidade.
A Liga LINCO de categoría minibásquet, dirixida a xogadores e xogadoras de 6 a 12 anos, cumpre xa o seu décimo quinto aniversario e se celebrará tódolos venres no pavillón de Navia de 16:15 a 18:00 horas. A Liga LINCO XL, na que participarán rapaces e rapazas infantís e cadetes entre 13 e 16 anos, terá lugar cada dous venres nas pistas do pavillón de Balaídos de 18:00 a 19:00 horas.
(Sergio González, Director Deportivo da entidade e adestrador do equipo de Liga EBA; e Óscar García e Pablo González, xogadores do equipo; coas novas camisetas das Liga LINCO 2017)
Preto de 200 nenos e nenas participarán nas Ligas LINCO 2017, escolares integrantes das Escolas Deportivas dirixidas e coordinadas do Club Baloncesto Seis do Nadal: as escolas deportivas dos colexios CEIP Seis do Nadal, CEIP Illas Cíes, CEP Celso Emilio Ferreiro, CEP Doutor Fléming, CEIP Pintor Laxeiro e CEIP Javier Sensat; e das tres Escolas Deportivas Municipais do Berbes, Balaídos e Navia.
"O programa municipal de Escolas Deportivas do Concello de Vigo fomenta a disputa de competicións lúdicas de base, sen vencedores nin vencidos, para que os rapaces complementen os adestramentos da semana coa competición, e esta liga que apoiamos é o mellor exemplo", explicou Manel Fernández, edil de Deportes do Concello de Vigo.