.
O Club Baloncesto Seis do Nadal - Coia organizará do 2 ao 4 de abril un Torneo Internacional doble, de categoría cadete e infantil, masculino e feminino, que recibirá a 400 participantes e 27 equipos. O evento, que conta co apoio da Concellería de Deportes e o Instituto Municipal dos Deportes (IMD), xogarase integramente no Pavillón Municipal de Balaídos, comezando polas mañás ás 10:00 horas e polas tardes ás 15:45 horas.
.
"O torneo cadete disputarase por terceira tempada consecutiva mentres que esta tempada recuperamos o torneo de categoría infantil, que se fixo por primeira vez na tempada 2005/2006", sinala Sergio González, Director Deportivo do club de Coia. No progama do torneo, os partidos clasificatorios disputaranse de mañá e de tarde se xogarán os cruces e as finais.
.
No torneo internacional cadete deste ano, a represetanción é moi importante: o Colexio Agustinos de León participará por primeira vez en categoría masculina, e repiten dous conxuntos portugueses, o F.C. Porto e o G.D.G. Basquetebol (Gafanha). Ademais, competirá a Selección Precadete Masculina Zonal, o que unido á presenza de equipos como o Básquet Coruña ou o Instituto Rosalía de Castro dá un alto nivel ao torneo.
.
En cadetes haberá dezaoito equipos, doce masculinos (con dúas competicións diferentes, a serie "A" e a serie "B") e seis femininos; en categoría infantil os seis equipos masculinos e tres femininos repartiranse en tres campionatos de tres.
.
Este é o segundo gran evento do ano que organiza o Club Baloncesto Seis do Nadal, que en xaneiro puxo en marcha a Liga Linco intercolexial. En maio espera un novo reto para o multipremiado club vigués: a celebración da décima edición do Torneo Internacional de Minibásquet, con 32 equipos.
.
Nesta presentación dos torneos aos medios estivo presente Laura Magdalena, Directora Xerente da Fundación VIDE, que acompañou a Sergio González e Francisca García, Director Deportivo e Secretaria do Club Baloncesto Seis do Nadal, club que foi nomeado mellor Club Siareiro de Base 2008/2009.