A Federación Galega de Prensa Deportiva fixo públicos na xornada do pasado mércores día 13 de xaneiro do 2010 o nome dos galardoados na Quinta Edición dos "Premios Galicia de Xornalismo Deportivo".
No quinto ano no que se entregan estos recoñecementos, o club Club Baloncesto Seis do Nadal Coia recibiu, pola súa páxina web, o Premio Galicia de Xornalismo Deportivo na modalidade "Internet".
O xurado dos V Premios Galicia de Xornalismo Deportivo 2009 destacou da páxina web do C.B. Seis do Nadal a calidade do desenvolvemento e a capacidade de esforzo que un club de base aporta para situarse á vangarda da información.
O Club Baloncesto Seis do Nadal - Coia, ilusionado por este recoñecemento, agradece á Federación Galega de Prensa Deportiva esta especial mención ao seu traballo e ademais quere expresar a súa satisfacción por acompañar na lista de premiados a grandes profesionais da prensa deportiva.
A Gala de entrega dos premios terá lugar o vindeiro día 22 de febreiro do 2010 no Auditorio de Galicia na cidade de Santiago de Compostela.